Покистон-Афғонистон тинчлик музокараларида келишувга эришилмади
Покистон Толибондан "Таҳрик-и-Толибон Покистон"ни террорчи деб эълон қилишни талаб қилмокда.
Покистон ҳукуматининг Афғонистондаги Толибон ҳукумати олдига қўйган талаблари Истанбул шаҳрида бўлиб ўтаётган музокараларда муҳокама қилинмокда. Покистон делегацияси "Таҳрик-и-Толибон Покистон" (TTP) гуруҳини расман террорчи ташкилот деб эълон қилиш ва унинг фаолиятига қарши курашишни талаб қилмокда.
Музокаралар жараёнида Покистон вакиллари TTP томонидан амалга оширилган ҳар қандай террористик ҳаракатлар учун жавобгарлик Афғонистон ҳукумати зиммасига юкланишини таъкидлаб, агар TTP ҳужумлари давом этса, Афғонистон ҳудудига ҳаво зарбалари бериш имконияти ҳақида оғохлантирган.
Толибон вакиллари эса бу масалада қатъий позицияни сақлаб, TTPни масъул гуруҳ сифатида тан олишдан бош тортганликларини ва бу муаммони Покистоннинг ички иши деб ҳисоблашларини билдирган.
Қатар ва Туркия воситачилигидаги музокараларда Покистоннинг етти нафар дипломати ва разведка ходими, шунингдек олти нафар Афғонистон вакили иштирок этди. Тўрт кундан бери давом этаётган музокараларда аниқ келишувга эришилмади.
