Хитойда блогерлар фаолияти чекланмоқда
Эндиликда блоггерлар тегишли соҳа бўйича диплом, лицензия ёки сертификат тақдим этишлари шарт.
Хитойда 25 октабрдан кучга кирган янги қонунга кўра, блоггерлар тиббиёт, ҳуқуқ, таълим ва молия каби мутахассислик талаб қиладиган соҳаларда контент яратиш учун расмий малака ҳужжатларини тақдим этишлари шарт қилиб белгиланди. Кибермакон маъмурияти (САС) томонидан эълон қилинган қоидалар Douyin, Bilibili ва Weibo каби платформаларда қўлланилмоқда.
Янги тартибга кўра:
- блоггерлар тегишли соҳа бўйича диплом, лицензия ёки сертификат тақдим этишлари мажбурий
- контент асосини ташкил этган тадқиқот ва манбаларни кўрсатиш талаб этилади
- платформалар янги қоидаларни амалда қўллашни бошлаган
Расмийлар тадбирнинг мақсади онлайн дезинформацияга қарши курашиш ва фойдаланувчиларни нотўғри маслаҳатлардан ҳимоя қилиш эканлигини таъкидламоқда. Бироқ танқидчилар янги қонун ижодкорлик ва сўз эркинлигини чеклаши мумкинлигини билдирмоқда.
