Илон Маск: 2030 йилгача смартфонлар йўқолади
Маск смартфонлар бутунлай йўқолиши ва уларнинг ўрнини сунъий интеллектга асосланган қурилмалар эгаллашини айтди.
Илон Маск 2030 йилга бориб анъанавий смартфонлар бозордан чиқиб кетиши ва уларнинг ўрнини сунъий интеллектга асосланган янги турдаги қурилмалар эгаллашини маълум қилди. Бу ҳақда у 31 октябрь куни журналист Жо Роган билан интервью чоғида фикр билдирди.
Маскнинг таъкидлашича, бугунги кунда “смартфон” деб аталувчи қурилмалар аслида сунъий интеллектнинг видео таҳлили учун мўлжалланган тугун сифатида ишлайди ва фақат алоқа учун зарур радио модуллари билан жиҳозланган. Келажакда эса фойдаланувчи қурилмасидаги сунъий интеллект тўғридан-тўғри сервердаги AI тизими билан ўзаро интеграциялашган ҳолда ишлайди.
Унинг фикрича, яқин йилларда операцион тизим ва алоҳида иловалар тушунчаси ўз аҳамиятини йўқотади. Уларнинг ўрнини AI имкониятлари билан тўлиқ интеграциялашган, асосан экран ва аудиога эга мосламалар эгаллайди.
Маск, шунингдек, сунъий интеллект фойдаланувчиларнинг эҳтиёж ва истакларини олдиндан англай оладиган даражага етишини ҳам тахмин қилмоқда.
