2 йиллик урушдан сўнг Ғазода мактаблар қайта очилмоқда

Икки йил давом этган ҳарбий ҳаракатлар ва доимий бомбардимонлардан сўнг Ғазо секторида таълим жараёни босқичма-босқич тикланмоқда. БМТнинг Фаластин қочқинлари билан ишловчи агентлигининг маълум қилишича, айрим мактаблар қайта фаолият бошлаган.

 

Олдинги урушлар давомида мактаб биноларининг катта қисми вайрон бўлган. UNRWA ҳисоб-китобларига кўра, сектордаги 564 та мактабдан қарийб 518 таси таъмирталаб ҳолатда. Шу боис кўплаб дарслар ҳозирча фавқулодда шароитларда — бошпаналарда, очиқ майдонларда ёки вақтинчалик синфхоналарда ўтказилмоқда.

 

Биринчи босқичда ўн минглаб ўқувчилар дарсларга қайтди. Болалар учун мактабга бориш нафақат таълим, балки урушдан кейинги руҳий тикланиш ва оддий ҳаётга қайтиш ҳиссини бераётгани таъкидланмоқда. Бироқ сув, электр, жиҳозлар ва дарсликлар етишмовчилиги, шунингдек хавфсизлик муаммолари ҳали ҳам жиддий тўсиқ бўлиб турибди.

 

Мутахассислар таълим тизимига етган зарарни “йўқолиб кетаётган авлод хавфи” билан баҳоламоқда. Ўқитувчилар, инфратузилма ва молиявий ресурслар етишмаслиги сабаб таълим жараёни тўлиқ ва барқарор тикланиши учун ҳали вақт талаб этилади.

 

Халқаро ташкилотлар мактабларни қайта тиклаш, ўқитувчиларни тайёрлаш ва болаларга психологик ёрдам кўрсатиш бўйича лойиҳаларни амалга оширмоқда. Таҳлилчиларнинг фикрича, узоқ муддатли барқарорлик учун хавфсизлик кафолатлари ва доимий инсонпарварлик ёрдами зарур.