2006 йилдан кейин туғилганлар учун чекиш тақиқланди
Бу орқали соғлом авлодни шакллантириш мақсад қилинган.
1 ноябрдан бошлаб Малдив оролларида тамаки истеъмоли бўйича янги чеклов амалга киритилди. Соғлиқни сақлаш вазирлиги маълумотига кўра, 2007 йил 1 январдан кейин туғилган ҳар қандай шахс — фуқаро бўладими ёки мамлакатга келган сайёҳ — эндиликда тамаки маҳсулотларини сотиб олиш, чекиш ёки сотиш ҳуқуқига эга эмас. Бу орқали келажакда чекишдан холи, соғлом авлодни шакллантириш мақсад қилинган.
Вазирлик таъкидлашича, қоида барчага бир хил татбиқ этилади ва Малдивга ташриф буюрувчи хорижликлар учун ҳам истисно йўқ.
Қонун бузилган тақдирда жавобгарлик белгиланган: тамакини вояга етмаганларга сотганлар 50 минг руфий миқдорида жарима тўлайди. Электрон сигареталардан ноқонуний фойдаланганлар учун эса 5 минг руфийлик жарима кўзда тутилган.
Маълумки, бундай «чекишсиз авлод» ғоясини илк бор Янги Зеландия амалга жорий этган эди. Бироқ мамлакатда ҳукумат алмашгач, бюджет тушумларини ошириш мақсадида чеклов бекор қилинди. Ҳозирда ўхшаш ташаббус Буюк Британияда ҳам муҳокама қилинмоқда.
