Жанубий Корея сунъий йўлдош орқали КХДРни кузатмоқчи

Жанубий Корея Шимолий Кореядаги ҳарбий фаолиятни кузатиш мақсадида янги разведка сунъий йўлдошини фазога учирди. Бу ҳақида Yonhap ахборот агентлиги хабар бермоқда. 

 

Қайд этилишича, бу амалиёт мамлакат томонидан 2025 йил охиригача якунлаш режалаштирилган бешта ҳарбий сунъий йўлдошни жойлаштириш дастурининг таркибий қисми ҳисобланади.

 

Расмийларга кўра, ушбу сунъий йўлдошлар КХДР ҳудудидаги ракета синовлари, ҳарбий инфратузилма ҳаракатланиши ва ҳудудий фаолиятни анча аниқ ва тезкор мониторинг қилиш имконини беради. Шунингдек, улар АҚШдан олинадиган сунъий йўлдош маълумотларига бўлган қўшимча қарамликни қисқартиришда муҳим аҳамият касб этади.

 

Жанубий Корея ҳукумати мазкур дастурни мамлакат мудофаа салоҳиятининг мустақиллигини ошириш ва Шимолий Корея билан давом этаётган ҳарбий кескинлик шароитида ахборот хавфсизлигини мустаҳкамлаш йўлидаги стратегик қадам сифатида баҳоламоқда.