Россияда меҳнат мигрантлари учун патент нархи оширилади
2026 йилдан патент нархи 8 900 рублдан 10 000 рублгача оширилиши режалаштирилмоқда.
Москва шаҳрида меҳнат мигрантлари учун патент (ишлаш рухсатномаси) қийматини ошириш кўзда тутилмоқда, деб хабар бермоқда “TASS”.
Маълумотга кўра, 2026 йилдан бошлаб патент нархи амалдаги 8 900 рублдан 10 000 рублгача кўтарилиши кутилмоқда. Бу ҳақда Москва шаҳар Думасининг Иқтисодий сиёсат ва ижтимоий-иқтисодий ривожланиш қўмитаси йиғилишида шаҳар Иқтисодий сиёсат ва ривожланиш департаменти раҳбари ўринбосари, Солиқ таҳлили бошқармаси бошлиғи Дарья Мурченко маълум қилган.
Тақдим этилган таклифга кўра, минтақавий коэффициент 2,9323 миқдорда белгилаш режалаштирилган. Ушбу ўзгариш тўлов ставкасининг оширилишига асос яратади.
Мурченконинг қайд этишича, патент нархининг кўтарилиши меҳнат мигрантларининг солиқ юкини Россия фуқаролариники билан мувофиқлаштиришга хизмат қилади.
Патент нархи учта таркибий қисмдан шаклланади:
- Солиқ кодексида белгиланган базавий қиймат;
- Иқтисодий ривожланиш вазирлиги томонидан ҳар йили тасдиқланадиган федерал дефлятор коэффициенти;
- Минтақавий коэффициент.
