Трамп Нигерияга қўшин юбориши мумкин
АҚШ президенти Нигериядаги вазиятни кескин танқид қилиб, Мудофаа вазирлигига эҳтимолий ҳарбий чоралар бўйича тайёргарлик кўрсатмаси берганини маълум қилди.
АҚШ президенти Дональд Трамп Нигерия ҳукуматини мамлакатда насроний аҳолига нисбатан содир этилаётган зўравонликларни тўхтатишга чақирди. Унинг таъкидлашича, вазият бартараф этилмаса, Америка ҳукумати Нигерияга кўрсатилаётган ёрдамни дарҳол тўхтатиши мумкин.
Трамп ўз баёнотида Нигерия ҳукуматининг насронийларга қарши ҳужумларга етарли даражада муносабат билдирмаётгани ҳақида қайд этган. “Агар ҳукумат насронийлар ўлдирилишига кўз юмишда давом этса, АҚШ барча ёрдамни бекор қилади ва зарурат туғилганда, ислом радикаллари таҳдиитини бартараф этиш учун қўшин юборишни кўриб чиқади”, — дейилади баёнотда.
АҚШ раҳбари Нигерияда шаклланган вазиятни “кескин чораларни талаб қилаётган жиддий муаммо” деб атади. Шунингдек, у Мудофаа вазирлигига эҳтимолий ҳарбий амалиятга тайёргарлик кўриш бўйича кўрсатмалар берганини маълум қилди.
