ОАВ: Путин 2050 йилгача президентликни давом эттириши мумкин
Норасмий маълумотларга кўра, 2050 йилда Путин мамлакат бошқарувини ўғлига топшириши эҳтимоли ҳам тилга олинмоқда.
Россия Президенти Владимир Путиннинг узоқ муддат давомида ҳокимиятда қолиш эҳтимоли борлиги ҳақида хорижий оммавий ахборот воситаларида янги маълумотлар пайдо бўлди. Даилй Стар нашри суриштирувчи журналист Иля Давлятчинга таяниб хабар беришича, Путин 2050 йилгача Россияни бошқариши мумкинлиги билдирилган.
Нашрга кўра, 73 ёшли давлат раҳбари Иосиф Сталиндан кейин мамлакатни энг узоқ бошқарган етакчи сифатида тарихга кирган. Қайд этилишича, унинг яна 25 йил давомида лавозимда қолиши эҳтимоли муҳокама қилинмоқда. Шунингдек, норасмий маълумотларда, келажакда давлат бошқарувини ўғли Иван Путинга топшириши тилга олинган. Иван Путин ҳозирда 10 ёшда бўлиб, 2050 йилда 35 ёш бўлади.
Маълумки, 2020 йилда Россия Конституциясига киритилган ўзгартиришлар Путиннинг президентлик муддатларини “нолга тенглаштириш” имконини берган эди. Бу унга 2036 йилгача давлат раҳбари сифатида фаолият юритиш ҳуқуқини тақдим этади.
Хорижий экспертлар ҳисоб-китобига кўра, Путин ҳозиргача давлат бошқаруви давомийлиги бўйича бир қатор тарихий сиёсий арбоблардан ўзиб кетган. Агар у лавозимда яна икки муддат қолса, Франсиско Франко ва Антонио ди Салазар билан тенглашиши, узоқ муддатли раҳбарлар сафида Муаммар Каддафий, Ким Ир Сен ва Фидел Кастро кўрсаткичларига яқинлашиши мумкин.
Кремль мазкур хабарлар юзасидан изоҳ бермаган. Сиёсатшунослар эса тарқатилган маълумотларни Россия сиёсий жараёнларида юз бериши мумкин бўлган узоқ муддатли стратегик ўзгаришларга ишора сифатида баҳоламоқда.
