Римда ўрта аср минораси қулаб тушди: бир киши ҳалок бўлди

 

Италия пойтахти Римда жойлашган ўрта асрларга оид Конти минорасининг бир қисми қулаб тушди. Ҳодиса оқибатида бир киши ҳалок бўлди, яна уч ишчи жароҳатланди. Бу ҳақда ББС хабар берди.

 

Маълум қилинишича, воқеа 3 ноябрь куни реставрация ишлари олиб борилаётган пайтда содир бўлган. Жароҳатланганларнинг барчаси қурилиш майдонида бўлган ишчилар экани қайд этилган. Дастлаб уч нафар жабрланувчи шифохонага етказилган.

 

Вайроналар остида қолган тўртинчи ишчини қутқариш чоғида минора яна қулаб тушган. Октай Строичи исмли ишчи тахминан 12 соатдан сўнг вайроналар орасидан чиқарилган, бироқ тез ёрдам машинасида унинг юраги тўхтаб қолган. Шифокорлар ҳаётни сақлаб қолишга уринган, аммо натижа бўлмаган. Руминия Ташқи ишлар вазирлиги марҳумнинг Руминия фуқароси эканини тасдиқлади.

 

Қутқариб олинган ишчилардан бирининг аҳволи оғир экани айтилмоқда. Воқеа жойига Рим мери Роберто Галтери ҳамда Италия маданият вазири Алессандро Жули бориб, вазият билан танишди. Тергов ишлари Рим прокуратураси томонидан бошланган.

 

Конти минораси 1203 йилда Папа Иннокентий ИИИ ва Сеня графлари топшириғига биноан қурилган бўлиб, дастлаб монастирь ҳудудида жойлашган ибодатхонанинг ўрнида турар жой ва мудофаа иншооти сифатида барпо этилган. Илк баландлиги 50 метрдан ортиқ бўлган минора кейинги асрлардаги зилзилалар ва қайта қурилишлар натижасида қисқарган бўлиб, ҳозирда 29 метрга тенг.