Сурия раҳбари АҚШга боради

 

Сурия президенти Аҳмад аш-Шара 10 ноябрь куни АҚШга ташриф буюради ва Доналд Трамп билан учрашади. Бу ҳақда АҚШнинг Туркиядаги элчиси, ҳамда Трампнинг Ливан ва Сурия бўйича маслаҳатчиси Том Баррак “Axios” нашрига берган интервьюсида маълум қилди.

 

Том Барракга кўра, аш-Шаранинг АҚШга келиши икки мамлакат ўртасидаги муносабатларни қайта тиклаш йўлидаги навбатдаги қадам бўлади.

 

“Axios” маълумотларига кўра, сафар давомида ал-Шара Суриянинг ИШИДга қарши курашаётган АҚШ бошчилигидаги халқаро коалицияга қўшилиши бўйича келишув имзолашни режалаштирган. 

 

Бундан аввал Доналд Трамп маъмурияти Конгресснинг Сурия бўйича санкцияларни тўлиқ бекор қилиш тўғрисидаги қарорини қўллаб-қувватлаган эди.

 

Мазкур санкциялар 2020 йил июнь ойида кучга кирган “Сезар қонуни” доирасида жорий этилган бўлиб, улар Сурия ҳукумати ва у билан ҳамкорлик қилувчи компанияларга — айниқса энергетика ва қурилиш соҳаларида — нисбатан қўлланилган эди.

 

Трамп маъмурияти илгари бу санкцияларни вақтинча юмшатган, аммо уларни бутунлай бекор қила олмас эди. Чунки бу ваколат фақат Конгресс томонидан тасдиқланиши керак.

 

Сўнгги марта Сурия вакили Оқ уйга 1999 йил декабрь ойида ташриф буюрган эди. Ўшанда ташқи ишлар вазири Фаруқ аш-Шара Исроил билан музокараларда қатнашган.

 

Аҳмад аш-Шаранинг бу сафаридан сўнг АҚШ воситачилигида Сурия ва Исроил ўртасида тўғридан-тўғри музокараларнинг бешинчи босқичи ўтказилиши кутилмоқда.

 

Том Барракнинг сўзларига кўра, ушбу музокараларнинг мақсади — йил якунига қадар икки давлат чегарасида хавфсизлик бўйича битимга эришиш мақсад қилинган.