Зоҳран Мамдани Нью-Йорк мерлиги сайловларида ғалаба қозонди
34 ёшли сиёсатчи Куомо ва Сливани ортда қолдирди ва Нью-Йорк тарихида илк мусулмон ҳамда энг ёш мер бўлди.
АҚШнинг Нью-Йорк шаҳрида бўлиб ўтган мер сайловларида демократлар партияси номзоди Зоҳран Мамдани ғолиб чиқди. Бу ҳақда Ассосиатед Пресс хабар берди.
34 ёшли Мамдани сайловда мустақил номзод Эндрю Куомо ҳамда Республикачилар партиясидан номзод Кёртис Сливани ортда қолдирди. У Нью-Йорк тарихида ушбу лавозимни эгаллаган биринчи мусулмон ва энг ёш мер бўлиб қолади.
Мамдани сайловолди дастурида уй-жой ижараси бозорини тартибга солиш, жамоат транспорти йўналишидаги автобус хизматини бепул қилиш ҳамда болаларни парваришлаш хизматлари нархини назорат остига олишни ваъда қилган.
Аввалроқ АҚШ Президенти Доналд Трамп ўз тарафдорларини Куомога овоз беришга чақирган ва Мамдани ғалаба қозонган тақдирда Нью-Йоркка федерал молиялаштиришни қисқартириш билан таҳдид қилган эди. Мамдани эса Трамп томонидан қўллаб-қувватланаётган номзодларни танқид қилиб, бу ҳолат “МАГА ҳаракати манфаатларини акс эттириши”ни таъкидлаган.
Нью-Йорк Ҳисоб палатаси маълумотларига кўра, шаҳар йилига қарийб 7,4 млрд доллар миқдорида федерал маблағ олади, бу эса шаҳар бюджетининг 6,4 фоизини ташкил этади.
