Маст эркак Мексика президентига шилқимлик қилди
Президент ҳолатни “барча аёлларга қарши тажовуз” деб баҳолади.
4 ноябрь куни Мексика президенти Клаудия Шейнбаум пойтахтдаги президент саройи яқинида оммавий тадбирга йўл олаётганида номаълум шахснинг ноўрин ҳаракатларига дуч келди. Бу ҳақда ТАГ24 хабар берди.
Ижтимоий тармоқларда тарқалган видеоларда акс этишича, Шейнбаум йўлда фуқаролар билан саломлашиб, суратга тушаётган пайтда маст ҳолатдаги эркак унга яқинлашиб, аввал елкасидан қучоқлаган, сўнгра белидан ушлаб, бўйнидан ўпишга уринган. Президентнинг хавфсизлик ходими вазиятга зудлик билан аралашиб, шахсни четга олиб чиққан ва у қўлга олинган.
Президент ҳолатни хотиржам тарзда қолиб — эркак билан суратга тушишга рози бўлган ва вазиятни кескинлаштирмасликка ҳаракат қилган.
Шейнбаум 5 ноябрь куни берган баёнотида воқеани “барча аёлларга нисбатан тажовузнинг ифодаси” деб баҳолади. У безорига нисбатан расмий шикоят киритганини ҳам маълум қилди.
“Бу ҳодиса шахсан менга эмас, мамлакатимиздаги ҳар бир аёлга тегишли. Бундай вазиятни мен аввал ҳам бошдан кечирганман – нафақат президент сифатида, балки талабалик йилларимда ҳам”, — деди Шейнбаум.
