ChatGPT билан боғлиқ ўз жонига қасд қилиш ҳолатлари учун OpenAI судга берилди
Даъвогарлар чатбот руҳий саломатликка зарар етказувчи суҳбатларни тўхтата олмаганини таъкидлашмоқда.
АҚШ ва Канададаги бир нечта оилалар сунъий интеллект хизматидан фойдаланиш оқибатида содир бўлган фожеалар юзасидан OpenAI компаниясига қарши судга мурожаат қилди. Улар компанияни “ChatGPT” фойдаланувчиларининг ўз жонига қасд қилишига сабаб бўлганликда айбламоқда. Мазкур даъво бўйича жами еттита суд иши қўзғатилган.
The Wall Street Journal тарқатган хабарга кўра, даъволарда тўрт нафар шахс – жумладан, вояга етмаган фойдаланувчи – ўз жонига қасд қилгани, яна уч киши эса сунъий интеллект билан узоқ мулоқотдан сўнг ақлдан озгани билдирилган.
Даъвогарлар AI билан олиб борилган “хавфли суҳбатлар” психик саломатликка путур етказганини таъкидлаб, чатбот алгоритмларига бундай ҳолатларни эрта аниқлаш ва автоматик тўхтатиш бўйича кучайтирилган ҳимоя механизмлари жорий этилишини талаб қилмоқда.
OpenAI мазкур вазиятни “ўта ачинарли” дея баҳолаб, компания 2024 йил октабр ойида ментал саломатлик билан боғлиқ хавфли ҳолатларнинг олдини олиш бўйича хавфсизлик протоколларини янада кучайтирганини маълум қилди.
