“Давлат кучли — тўнтаришларга йўл қўйилмайди” — Садир Жапаров

Қирғизистон президенти Садир Жапаров яқинда юзага чиққан норозиликлар, хусусан ҳайдовчилик гувоҳномалари масаласи атрофида баёнот берди. У аҳолига мурожаат қилиб, ҳайдовчилик гувоҳномасини сотиб олиш амалиётига барҳам берилиши, эндиликда ҳақиқий билим ва малака талаб этилиши кераклигини таъкидлади ва бунинг учун қатъий чора кўрилишини маълум қилди.

 

Президент шунингдек мамлакатдаги энергетика вазиятига алоҳида эътибор қаратди: сув захиралари камайгани ва электр импорти зарурлиги боис жорий чора-тадбирлар муҳимлиги ҳақида сўзлаб, олдинги йилларда тўпланган қарзларни қисқартириш, янги ГEС лойиҳаларини ишга тушириш орқали мустаҳкамланишга эришилаётганини билдирди. У 2020–2025 йилларда давлат қарзини камайтириш учун қилинган ишларни санаб ўтди ва келаси йилларда энергетика соҳасида инвестициялар натижа беришини айтди.

 

Жапаров таъкидича, йўл ҳаракати хавфсизлигини ошириш мақсадида мактабларда йўл қоидалари дарси жорий этилади, ҳайдовчиликка тайёргарлик тизими кучайтирилади ва имтиҳонлар қатъийлаштирилади — ноқонуний усуллар билан гувоҳнома олганларга қайта имтиҳон топшириш мажбурияти қўйилади. У провокациялар ва тартибсизликларга қарши кескин чора кўрилишини, давлатнинг барқарорлиги бузилишига йўл қўйилмаслигини қайд этди.

 

Президент сўзларида давлат томонидан амалга оширилаётган йирик энергетика лойиҳалари — янги кичик ГEСлар, Камбар-Ата, ва бошқа инфратузилма ишлари ҳақида ҳам маълумот берилди; у булар амалга ошгач Қирғизистон энергетик жиҳатдан мустақил ва экспортчи давлатга айланишини таъкидлади. Жапаров аҳолидан ҳозирги қийинчиликларга сабр қилиш ва энергияни тежашни давом эттиришни сўради.