АҚШда 40 кунлик танаффус якунланмоқда - ҳукумат қайта иш бошлайди

 

АҚШда 40 кун давом этган ҳукумат фаолиятининг қисман тўхтатилиши якунланмоқда. Сенаторлар икки партия — демократлар ва республикачилар ўртасида федерал идораларни қайта ишга тушириш имконини берувчи келишувни маъқуллашди деб хабар берди CNN.

 

Мазкур келишув натижасида 1,5 миллиондан ортиқ давлат хизматчилари ва ҳарбий ходимлар ўз фаолиятини қайта бошлайди. Ҳукуматнинг ёпилишига соғлиқни сақлаш дастурларини молиялаштириш бўйича келишмовчиликлар сабаб бўлган эди. Демократлар Medicaid дастурига субсидияларни сақлаб қолиш ва суғурта солиқлари бўйича имтиёзларни кенгайтиришни талаб қилди, республикачилар эса ушбу таклифларга қарши чиқди.

 

Муросага эришишда Сенатдаги республикачилар етакчиси Жон Туннинг ташаббуси муҳим омил бўлди. У соғлиқни сақлаш субсидияларига оид масалани алоҳида овозга қўйишни таклиф этганидан сўнг томонлар битимга келишди. Келишув ходимларни тўлиқ ишга қайтариш ва улар фаолият тўхтаган вақт учун компенсация тўлашни ҳам назарда тутади.

 

Мазкур ёпилиш АҚШ тарихида энг узоқ давом этгани билан қайд этилди. Бунгача рекорд 35 кун бўлиб, у 2019 йилда Доналд Трамп президентлиги даврида кузатилган эди.

 

Узоқ давом этган тўхталиш ижтимоий дастурлар фаолиятининг қисқаришига, аҳолининг озиқ-овқат ёрдами ҳажмининг камайишига, 1500 га яқин авиақатнов бекор қилинишига ва иқтисодиётга ҳар куни миллиардлаб доллар йўқотишларга сабаб бўлди.

 

Келишув энди Вакиллар палатаси томонидан тасдиқланиши ҳамда Президент имзосидан сўнг кучга киради. Шундан кейин федерал идоралар тўлиқ фаолиятини тиклайди.