BBC раҳбарлари Трамп нутқини сохталаштиргани учун истеъфога чиқди

“BBC мукаммал эмас ва биз доимо очиқ, шаффоф ва масъулиятли бўлишимиз керак. Бу ягона сабаб бўлмасада, BBC News атрофидаги ҳозирги муҳокамалар қароримга таъсир қилди. BBC умуман олганда яхши ишлади, лекин айрим хатолар бўлди ва бош директор сифатида якуний жавобгарлик менинг зиммамда”, — деган Дейви мактубида.

 

Унга кўра, BBC бошқарув кенгаши билан истеъфога чиқиш муддатларини келишиб, яқин ойларда лавозимни янги раҳбарга тартибли равишда топширишни таъминлайди.

 

“Panorama" дастурида Трамп ҳақидаги воқеа BBC'га зарар етказадиган даражага етди. Ҳа, хатолар бўлган, аммо BBC News ташкилот сифатида тарафкашлик қилган деган айбловлар ёлғон”, - дея қўшимча қилган Дебора Тернесс ҳам.

 

АҚШ президенти Доналд Трамп BBC раҳбарларининг кетишини олқишлаб, уларни “сайловга таъсир ўтказмоқчи бўлган носамимий одамлар” деб атади.

 

“BBC раҳбарлари 6 январдаги менинг мукаммал нутқимни таҳрирлаб, ҳақиқатни бузганликда қўлга тушишди. Бу демократия учун даҳшатли ҳолат”, - дея ёзган у ўзининг Truth Social ижтимоий тармоғида.

 

Трамп шунингдек, Борис Жонсоннинг Daily Mail газетасидаги мақоласини улашиб, собиқ бош вазирнинг “BBC лицензия тўловини тўлашдан бош тортиш керак” деган фикрини маъқуллаган.

 

Оқ уй матбуот котиби Каролин Ливитт эса BBC'ни “100 фоиз сохта янгилик манбаи” деб атаб, бу ҳодисани “холисликнинг бутунлай йўқолганини кўрсатувчи мисол”, — деб баҳолади.

 

BBC ичида ҳам айрим журналистлар ва муҳаррирлар “Panorama” жамоасининг иш услубини кескин танқид қилишди. Ички текширув натижаларига кўра, айрим таҳрирчилар сиёсий контекстни ҳисобга олмасдан лавҳаларни “драматик эффект” учун қайта жойлаштирган.

 

BBC раиси Самир Шах ҳам ушбу воқеаларга ўз муносабатини билдирган. “Бу BBC учун қайғули кун. Тим сўнгги беш йил давомида ажойиб бош директор бўлди. У ББСъни қатъият, мақсад ва узоқни кўра билиш билан бошқарди”, - деган Шах. У кенгаш Тимни қўллаб келгани, аммо унга нисбатан кучли босим бўлгани ва бу қарор сабаблари тушунарли эканини қўшимча қилган.

 

Трамп эса ижтимоий тармоқда қолдирган постида собиқ BBC вакилларини “инсофсизлар” дея атаган.  “Ҳамманинг истеъфога чиқаётганини кўряпсизлар, чунки улар менинг жуда яхши нутқимни бузиб кўрсатди. Бу сайловларга аралашмоқчи бўлган жуда инсофсиз одамлар. Энг ёмони, улар энг яқин иттифоқчиларимиздан деб ҳисобланадиган мамлакатдан!”, - деган Оқ уй раҳбари. 

 

Истеъфога сабаб бўлган можаро “The Telegraph” газетасининг мақоласидан кейин юзага келган. Газета BBC Panorama дастури “Трамп: Иккинчи имконият?” фильмида Трампнинг нутқи таҳрирлангани, икки алоҳида парча кетма-кет кадр сифатида монтаж қилингани сабабли у тартибсизликларни қўллаб-қувватлагандек кўринганини таъкидлаган. Бу ҳақда ББСънинг таҳририй стандартлар бўйича собиқ маслаҳатчиси Майкл Прескотт томонидан ёзилган ички хатга таянилган.

 

Британия Маданият вазири Лиза Ненди ҳам бу вазиятни “жуда жиддий” деб атаган ва BBC'га нисбатан бошқа айбловлар ҳам борлигини, энг оғири – “BBC мураккаб мавзуларни ёритишда тизимли тарафкашликка эга” деган фикр эканини айтган.

 

Парламент қуйи палатасининг маданият, медиа ва спорт қўмитаси BBC раисидан вазият бўйича изоҳ сўраб расмий мактуб йўллаган.