Истанбул собиқ мери Экрем Имомоғли 2000 йилгача қамалиши мумкин
У 143 та эпизод бўйича, жумладан, фирибгарлик ва порахўрликда айбланмоқда.
Истанбул Бош прокуратураси шаҳар собиқ мери, мухолифатдаги сиёсатчи Экрем Имомоғлига нисбатан олиб борилган терговни якунлади ва унга 828 йилдан 2300 йилгача озодликдан маҳрум этиш жазоси тайинлашни сўради.
Айблов хулосасига кўра, Имомоғли жиноий гуруҳ тузиш ва унга раҳбарлик қилиш, порахўрлик, фирибгарлик, ноқонуний битимлар орқали Истанбул шаҳрига 3,8 миллиард долларлик зарар етказганликда айбланмоқда.
Прокуратура томонидан тайёрланган 3900 бетлик ҳужжатда жами 143 та жиноий эпизод қайд этилган.
Экрем Имомоғли 2019 йилда Жумҳурият Халқ партияси (ЧП) номзоди сифатида Истанбул мери этиб сайланган эди. У Туркия президенти Ражаб Тоййиб Эрдўғаннинг асосий сиёсий рақибларидан бири сифатида тилга олиниб, 2028 йилги президентлик сайловларида иштирок этиши мумкин бўлган номзодлар рўйхатига киритилган эди.
Имомоғли 2025 йил март ойида муниципал тендерлар жараёнида ваколатни суиистеъмол қилишда айбланиб ҳибсга олинган. Ҳибсга олиниши ортидан Истанбулда оммавий норозилик намойишлари юз берган, улар полиция томонидан куч билан тарқатилган.
Шунингдек, Истанбул университети шу йилнинг ўзида Имомоғлидан президентлик сайловларига номзод сифатида қатнашиш учун зарур бўлган дипломини қайтариб олган.
2025 йил июль ойида суд Имомоғлини давлат амалдорини омма олдида ҳақорат қилишда айбдор деб топган ва 1 йил 8 ой муддатга озодликдан маҳрум этган. Бошқа айрим айбловлар бўйича эса у оқланган эди.
