“Ўзбекистон ва Озарбайжон қардош мамлакатлар, ишончли иттифоқчилардир” - Илҳом Алиев
Озарбайжон Президенти Тошкентдаги Марказий Осиё давлатлари раҳбарлари учрашуви арафасида икки мамлакат алоқаларининг мустаҳкамлигини таъкидлади.
Тошкент шаҳрида бўлиб ўтадиган Марказий Осиё давлатлари раҳбарларининг еттинчи Маслаҳат учрашуви арафасида Озарбайжон Республикаси Президенти Илҳом Алиев билан суҳбат ташкил этилди. Давлат раҳбари Озарбайжон ва Ўзбекистонни ўзаро тарихий илдизлар, маданий яқинлик ва дўстлик ришталари боғлаб туришини қайд этди.
Президент Алиев сўнгги йилларда икки мамлакат ўртасидаги алоқалар янги босқичга кўтарилганини, давлат раҳбарларининг дўстона учрашувлари ва қўшма лойиҳалари туфайли ҳамкорлик иттифоқчилик даражасига етганини таъкидлади. Унинг сўзларига кўра, бугунги кунда Ўзбекистон ва Озарбайжон иқтисодиёт, энергетика, транспорт ҳамда маданият соҳаларида самарали ҳамкорлик олиб бормоқда.
Шунингдек, Илҳом Алиев Ўзбекистоннинг Қорабоғни тиклашдаги амалий ёрдамини ва қардошлик рамзи бўлган ташаббусларини юқори баҳолади. У икки мамлакат муносабатлари нафақат икки томонлама, балки халқаро миқёсда ҳам тобора мустаҳкамланаётганини айтиб, Ўзбекистон Президенти Шавкат Мирзиёевни “яқин дўст ва ишончли иттифоқчи” деб атади.
