Путин 2026 йилда Қозоғистонга ташриф буюриш таклифини қабул қилди
Бу Россия президентининг 2022 йилда Украинадаги ҳарбий ҳаракатлар бошланганидан буён Қозоғистонга амалга оширадиган бешинчи сафари бўлади.
Россия Президенти Владимир Путин Қозоғистон Президенти Қосим-Жомарт Тўқаевнинг 2026 йилда Қозоғистонга ташриф буюриш таклифини қабул қилди. Бу ҳақда Кремль матбуот хизмати маълум қилди.
Путин давлат ОАВларига берган изоҳида: “Раҳмат, мен мамнуният билан Қозоғистонга келаман”, — дея таъкидлади. Мазкур ташриф Россия Президентининг 2022 йилда Украинадаги ҳарбий ҳаракатлар бошланганидан буён Қозоғистонга амалга оширадиган бешинчи сафарига айланади. Ташрифнинг аниқ санаси кейинчалик эълон қилинади.
Маълумки, Қозоғистон Россия ва Хитой ўртасида жойлашган бўлиб, Украинадаги можаро давомида дипломатик мувозанатни сақлаб қолишга интилмоқда.
Шу ҳафтада Москвада ўтган музокаралар чоғида Президент Тўқаев АҚШга қилган ташрифи натижалари юзасидан Путинга батафсил маълумот берди. Кремль матбуот котиби Дмитрий Песковнинг сўзларига кўра, икки давлат раҳбарлари учрашувда қўшма иқтисодий лойиҳаларни муҳокама қилди ҳамда Қозоғистонда фаолият юритаётган Россиянинг йирик нефть компаниялари — “Лукойл” ва “Роснефт” корхоналари фаолиятига АҚШ санкцияларининг таъсири юзасидан фикр алмашди.
Учрашув якунида томонлар Россия ва Қозоғистон ўртасидаги стратегик шерикликни мустаҳкамлаш, савдо-иқтисодий ҳамкорликни янада кенгайтириш ҳамда 2024 йилда товар айирбошлаш ҳажмини 30 миллиард долларгача етказиш йўлида ҳамкорликни давом эттиришга келишиб олдилар.
Путин Тўқаевнинг Москвага ташрифи икки томонлама муносабатларни “ҳукуматлараро юқори даражага кўтарганини” алоҳида таъкидлади.
