Туркиянинг Озарбайжонда қулаган ҳарбий самолёти уриб туширилгани айтилмоқда — ОАВ
Мутахассис радар маълумотларига таянган ҳолда ҳалокатга метеорологик омиллар сабаб бўлганини рад этди.
Туркия Ҳарбий ҳаво кучларига тегишли С130 ҳарбий юк самолётининг Грузия чегараси яқинида ҳалокатга учраши оқибатида 20 нафар турк аскари ҳалок бўлди. Фожиа сабаблари юзасидан текширувлар давом этар экан, CNN Турк телеканалининг метеорология бўйича маслаҳатчиси профессор Орҳан Шен ҳалокатга об-ҳаво шароитлари сабаб бўлган бўлиши мумкинлиги ҳақидаги тахминларга изоҳ берди.
Профессор Шеннинг сўзларига кўра, “авария метеорологик омиллар туфайли юз берган бўлиши эҳтимолдан йироқ”. У шундай деди: “Ноқулай об-ҳаво шароити асосан учиш ёки қўниш жараёнида таъсир кўрсатади. 7 километрдан юқори баландликда эса бундай шароитлар самолётнинг қулаши учун сабаб бўла олмайди.”
Мутахассис радар кузатувлари асосида ҳалокат содир бўлган ҳудудда булут изи, реактив оқим ёки турбулентлик белгиси аниқланмаганини, минтақада шамол тезлиги ҳам хавфли даражада бўлмаганини маълум қилди.
“Ҳеч қандай метеорологик ҳодиса қайд этилмади. Тоза ҳаводаги турбулентлик ҳатто содир бўлганда ҳам, С130 каби оғир ҳарбий самолётлар учун хавф туғдирмайди. Тарихда бундай ҳолат кузатилмаган”, — дея қўшимча қилди Шен.
С130 самолёти дунёнинг кўплаб мамлакатларида қўлланиладиган, оғир юк ташиш ва ҳарбий операциялар учун мўлжалланган энг ишончли транспорт самолётларидан бири ҳисобланади. Мутахассисларнинг фикрича, ҳалокат сабаблари техник носозлик ёки бошқа омиллар билан боғлиқ бўлиши мумкин.
