Венесуэлада ҳарбий сафарбарлик эълон қилинди
АҚШ кемалари ва ҳарбий қўшинларининг Кариб денгизида тўпланиши ортидан Венесуэла мамлакатида ҳарбий сафарбарлик жорий қилинди.
Мудофаа вазири Владимир Падрино Лопеснинг сўзларига кўра, қуруқлик, ҳаво, денгиз ва захира кучлари чоршанбагача машғулотлар ўтказади. У бу ҳарбий ҳаракатни АҚШ томонидан келаётган “империалистик таҳдид”га жавоб сифатида тасвирлади. Бу ҳақда CNN хабар қилди.
Машғулотларда мунтазам ҳарбий бўлинмалар билан бирга Боливарча милиция ҳам иштирок этади — бу фуқаролардан ташкил топган захира куч бўлиб, уни марҳум президент Уго Чавес яратган. У Симон Боливар — Испаниядан мустақиллик учун курашган бир қатор Лотин Америкаси мамлакатлари озодлик етакчиси номи билан аталган.
Мудофаа вазири бу буйруқни тўғридан-тўғри президент Николас Мадуро берганини айтиб, машғулотнинг мақсади бошқарув, назорат ва алоқа тизимини такомиллаштириш ҳамда мамлакат мудофаасини таъминлаш эканини таъкидлади.
Бу ҳаракат икки давлат ўртасидаги кескинлик кучаяётган бир пайтда амалга оширилмоқда. Сешанба куни АҚШ ҳарбий-денгиз кучлари АҚШнинг энг йирик ҳарбий кемаси — “УСС Gerald Р. Ford” авиаташувчиси — Лотин Америкасининг катта қисмини ўз ичига олган АҚШнинг Жанубий қўмондонлиги ҳудудига етиб келганини эълон қилган эди.
