“Ҳаддан ошишни бас қилинг” — Садир Жапаров амалдорларни огоҳлантирди

Қирғизистонда тўйлар ва кўнгилочар масканлар соат 22:00 гача ишлаши белгиланганидан сўнг, текширувчилар томонидан рейдлар ўтказилди. Аммо ушбу рейдлар давомида амалдорларнинг ортиқча қаттиққўллик кўрсатгани Қирғизистон президенти Садир Жапаровнинг кескин танқидига сабаб бўлди.

 

Президентнинг айтишича, тартиб ўрнатиш зарур бўлган жойлар аниқ — тунги клублар, кеч соатларгача давом этадиган байрамлар ва катта зиёфат заллари. Бироқ текширувлар вақтида ҳатто умумий овқатланиш шохобчалари, КФС каби фастфуд тармоқлари ёпилиб, меҳмонлар ҳайдаб чиқарилгани, тадбиркорларга қўпол муносабатда бўлингани ва етарли асос бўлмасдан чироқ ҳамда сув ўчирилгани кузатилган.

 

Жапаров амалдорларни тартибни нотўғри талқин қилаётганликда айблаб, Бишкек ва Ўш шаҳарларидаги раҳбарларни кескин огоҳлантирди.

 

“Бундай ҳаддан ошишни бас қилинг! Электрни тежашни аввало давлат муассасаларидан бошланг. Тинч ишлаётган кичик бизнесга тегманг ва уларга халақит берманг”, — деди у.