Таиландда россиялик “жаҳон тоифасидаги хакер” қўлга олинди

 

Таиланд киберполицияси Федерал қидирув бюроси (ФҚБ) билан ҳамкорликда АҚШ ва Европа давлат тизимларига киберҳужумларда гумон қилинаётган 35 ёшли Россия фуқаросини қўлга олди. АҚШ расмийлари унинг экстрадициясини талаб қилмоқда.

 

Расмий маълумотларга кўра, гумонланувчи 6 ноябрь куни Пхукет оролида ўтказилган махсус операция давомида ҳибсга олинган. У 30-октабрда мамлакатга кирган бўлиб, Таланг туманидаги меҳмонхоналардан бирида яшаб келган.

 

Тинтув чоғида ундан ноутбуклар, мобил телефонлар ва криптовалюта ҳамёнлари топилди. Унинг криптовалюта ҳисобларида 14 миллион баҳтдан (қарийб 432 минг доллар) ортиқ маблағ музлатилган. Таиланд киберполицияси бу маблағлар киберфирибгарлик фаолияти билан боғлиқ бўлиши мумкинлигини билдирди.

 

Гумонланувчининг исми расман эълон қилинмаган. Бироқ халқаро ОАВ маълумотларига кўра, ФҚБ базаларида 35 ёшли россиялик кибержиноятчи сифатида фақат бир шахс – Мурманск вилоятида туғилган, Россия Бош разведка бошқармаси (ГРУ)нинг 26165-ҳарбий қисмида хизмат қилган катта лейтенант Алексей Лукашев қидирувда бўлган.

 

У APT28 (Fancy Bear) гуруҳи таркибида 2016 йилги АҚШ президентлик сайловларига аралашиш, Демократик партия серверларини бузиш ва бошқа қатор йирик киберҳужумларда иштирок этганликда айбланмоқда.

 

Таиланд расмийлари уни АҚШга экстрадиция қилиш жараёнига тайёргарлик кўрилаётганини маълум қилди. Россиянинг Пхукетдаги Бош консулхонаси ҳибсга олинган шахс билан учрашиш бўйича рухсат олишга уринмоқда.