Carlyle “Лукойл”нинг хорижий активларини харид қилиш имкониятини ўрганмоқда
Санкциялар ортидан “Лукойл”нинг Gunvor билан битими тўхтатилгач, АҚШлик Carlyle унинг халқаро активлари бўйича қизиқиш билдирган. Компания хорижий активлар қиймати 22 млрд долларга баҳоланган.
АҚШнинг йирик хусусий инвестиция компанияларидан бири — Carlyle Group Россиянинг «Лукойл» компаниясига тегишли хорижий активларни сотиб олиш эҳтимолини ўрганаётгани ҳақида вазиятдан хабардор манбалар маълум қилди.
Маълум қилинишича, компания ҳозирда ушбу истиқболни баҳолашнинг дастлабки босқичида бўлиб, битимни амалга ошириш учун зарур бўлган АҚШнинг махсус рухсатномасига мурожаат қилишни режалаштирмоқда.
АҚШ томонидан Россия компаниясига нисбатан жорий этилган санкциялар ҳамда «Лукойл»нинг Швейтсарияда жойлашган Gunvor компаниясига хорижий активларини сотиш ҳаракати блоклангани сабабли мазкур жараён халқаро майдонда катта эътиборга сабаб бўлмоқда.
«Лукойл» дунё нефть қазиб олишининг қарийб 2 фоизини ташкил этади, компаниянинг хориждаги активлари 2024 йилги ҳужжатларга кўра 22 миллиард долларга баҳоланган. Gunvor аввал ушбу активларни харид қилишга уриниб кўрган, бироқ АҚШ Ғазначилиги бунга қарши чиқиши ортидан, шунингдек Россия томони Гунворни “Кремль қўғирчоғи” тарзида баҳолагани сабаб жараён тўхтатилган эди.
Ҳозирча Carlyle ҳам, Лукойл ҳам юзага келган вазият бўйича изоҳ бермаган.
Лукойлнинг Европада учта нефтни қайта ишлаш заводи, Қозоғистон, Ўзбекистон, Ироқ, Мексика, Гана, Миср ва Нигериядаги нефть конларида улушлари ва дунё бўйлаб, жумладан, АҚШда ҳам юзлаб чакана ёнилғи қуйиш шохобчалари мавжуд.
АҚШнинг сўнги санкциялари Лукойлнинг Ироқ, Финляндия ва Болгариядаги фаолиятини ҳам тўхтатди .
Дунёдаги энг йирик хусусий капитал, муқобил активларни бошқариш ва молиявий хизматлар кўрсатувчи фирмалардан бири бўлган Carlyle бошқарувидаги 474 миллиард долларлик активларга эга.
