Доналд Трамп BBC'ни судга бермоқчи
Корпорация ўтган ҳафта президент нутқининг айрим қисмларини нотўғри таҳрир қилгани учун расмий узр сўраган бўлсада, эфирдаги кўринишларни рад этиш ва моддий компенсация тўлашдан бош тортган.
АҚШ президенти Доналд Трамп Британиянинг BBC корпорацияси устидан судга мурожаат қилиш ниятида эканини маълум қилди. Унга кўра, “Panorama” дастури учун тайёрланган ҳужжатли фильмда 2021 йил 6 январ куни Kапитолий воқеалари арафасида айтилган нутқининг айрим қисмлари нотўғри таҳрир қилингани ва ҳақиқий мазмун бузиб кўрсатилгани президент томонидан манипуляция сифатида баҳоланган.
Трампнинг билдиришича, BBC унинг нутқининг турли эпизодларини бирлаштириб, вазиятни нотўғри талқин қилган. Корпорация ўтган ҳафта мазкур монтаж хатоси учун расмий узр сўраган бўлсада, эфирдаги кўринишларни рад этиш ёки моддий компенсация тўлашдан бош тортган.
Мазкур ҳолатдан сўнг Трампнинг юридик жамоаси BBC устидан 1 миллиард доллардан 5 миллиард долларгача бўлган миқдорда даъво билан судга мурожаат қилишини билдирган. Даъво доирасида эфирдаги нотўғри маълумотларни раддия қилиш, расмий узр сўраш ва моддий товон ундириш талаб қилинади.
Трампнинг айтишича, ушбу суд аризаси “катта эҳтимол билан келаси ҳафта” тақдим этилади. Фильмда унинг 2021 йил 6 январдаги чиқишидан икки турли парчани бирлаштириш орқали битта эпизод сифатида намойиш этилгани, президент томонидан “қасддан нотўғри ёритиш” деб баҳоланган. BBC эса монтаж хатосини тан олган, бироқ молиявий жавобгарликни қабул қилмаган.
