“Жанубий Америка навбатдаги Ғазо бўлишини истайсизми?” — Мадуро

Венесуэла президенти Николас Мадуро Каракасда бўлиб ўтган халқаро ҳуқуқшунослар йиғилишида АҚШнинг Кариб минтақасидаги ҳарбий фаоллигини кескин танқид қилди. У Америка халқига мурожаат қилиб, Вашингтоннинг сиёсати Венесуэлани эмас, балки бутун Лотин Америкасини нишонга олаётганини айтди.

 

“Ғазо фожиаси бутун дунёни ларзага солди. Ҳар куни аёллар ва болалар қурбон бўлмоқда. Сиз Жанубий Америкада ҳам шундай вазиятни кўришни истайсизми?”, — деди Мадуро. У Кариб денгизидаги ҳарбий ҳаракатлар минтақада кескинликни кучайтириши ва катта фожиага сабаб бўлиши мумкинлигини таъкидлади.

 

Венесуэла раҳбарининг сўзларига кўра, АҚШ президенти Доналд Трамп фармони асосида наркокартелларга қарши кураш баҳонасида минтақага сувости кемаси ва ҳарбий кемалар жойлаштирилган. Бунга жавобан Каракас 4,5 миллионлик ҳарбий кучларни сафарбар қилган ҳамда кенг кўламли машғулотларни бошлаган.

 

Мадуро суверенитет ва тинчликни ҳимоя қилишга тайёрлигини айтар экан, унинг чиқиши йиғилганлар томонидан олқиш билан кутиб олинди. Шу билан бирга, Карибдаги вазият халқаро ҳамжамият эътиборини тортишда давом этмоқда.