Мексикада “Z авлоди” намойишлари авж олди: 100 дан ортиқ полициячи жароҳатланди
Намойишлар ижтимоий тармоқлар орқали уюштирилган бўлиб, иштирокчилар мамлакатдаги жиноятчилик, коррупция ва наркокартелларнинг кучайиб бораётган фаолиятидан норози эканини билдирмоқда.
Мексика пойтахти Мексико шаҳрида минглаб ёшлар Президент Клаубия Шейнбаум қароргоҳи олдида норозилик намойиши ўтказди. Бу ҳақда The Washington Post ва Reuters ахборот агентликлари хабар бермоқда.
Маълумотларга кўра, намойишчилар Миллий саройга бостириб киришга уриниб, хавфсизлик кучлари билан тўқнашувга киришган. Жараён давомида полиция кўздан ёш оқизувчи газ қўллаган. Маҳаллий ОАВнинг хабар беришича, тўқнашувларда камида 120 киши жароҳат олган, шулардан 100 нафари ҳуқуқни муҳофаза қилувчи органлар ходимларидир.
Полиция 20 нафар намойишчини қўлга олган, яна 20 киши маъмурий ҳуқуқбузарликда айбланмоқда.
Намойишлар ижтимоий тармоқлар орқали уюштирилган бўлиб, иштирокчилар мамлакатдаги жиноятчилик, коррупция ва наркокартелларнинг кучайиб бораётган фаолиятидан норози эканини билдирмоқда. Норозиликлар, хусусан, ноябрь ойида Уруапан шаҳри мери Карлос Мансо фестиваль давомида отиб ўлдирилганидан кейин кескинлашган.
Мексика президенти Клаубия Шейнбаумнинг сўзларига кўра, акциялар “ўнг қанот сиёсатчилар ва айрим бизнес доиралари томонидан молиялаштирилаётган бўлиши мумкин”.
Сўнгги ойларда Марокаш, Мадагаскар, Перу ва Непалда ҳам ёшлар томонидан турли шаклдаги оммавий норозилик намойишлари кузатилган. Бундай акциялар асосан ижтимоий тармоқлар орқали тезкор тарзда ташкил этилаётгани қайд этилмоқда.
