Қозоғистоннинг 11 шаҳрида ҳаво сифати кескин ёмонлашиши кутилмоқда
Мутахассислар Олмаота, Қарағанда ва Темиртовнинг Қозоғистондаги ҳавоси энг ифлосланган ҳудудлар сифатида қайд этилиши мумкинлигини таъкидлади.
17 ноябрь куни Қозоғистоннинг 11 шаҳрида ҳаво сифати кескин пасайиши прогноз қилинмоқда. Бу рўйхатга Олмаота, Остона, Атирау, Оқтобе, Чимкент, Қарағанда, Жезқазған, Темиртов, Балхаш, Ўскемен ва Риддер киради. «Казгидромет» маълумотига кўра, бу ҳудудларда ноқулай метеорологик шароитлар, хусусан, шамолнинг сустлиги, туман ва атмосфера инверсияси кузатилиши кутилмоқда. Мутахассислар ушбу омиллар ҳаводаги зарарли моддалар тарқалишини секинлаштириб, уларнинг ер сатҳида тўпланишига сабаб бўлишини таъкидлашган.
Аҳолига очиқ ҳавода камроқ бўлиш, айниқса йирик автомобиль йўлларидан узоқроқ юриш, шунингдек сурункали ўпка касалликлари, аллергия ёки юрак-қон томир хасталиклари бўлган шахслар зарур дори воситаларини ўзлари билан олиб юришлари тавсия қилинади. Мутахассислар Олмаота, Қарағанда ва Темиртовнинг Қозоғистондаги ҳавоси энг ифлосланган ҳудудлар сифатида қайд этилишини ва қиш мавсумининг бошланиши билан ҳаво циркуляциясининг пасайиши вазиятни янада мураккаблаштириши мумкинлигини огоҳлантиради.
