Трамп Россия билан ҳамкор давлатларга нисбатан кескин санкциялар жорий этилишини эълон қилди

 

АҚШ президенти Доналд Трамп Конгресс томонидан илгари сурилган ва Россия билан иқтисодий ҳамкорлик қилаётган давлатларга нисбатан санкциялар жорий этишни кўзда тутувчи қонун лойиҳасини қўллаб-қувватлашини маълум қилди. Президент Эронни ушбу рўйхатга киритиш ҳам мумкинлигини тан олди.

 

Трамп Палм-Бичдан Вашингтонга учишдан аввал журналистлар саволларига жавоб берар экан, қуйидагиларни айтди: “Бу ташаббус ҳақида эшитганман ва мен бунга розиман. Республикачилар Россия билан бизнес юритаётган ҳар қандай давлатга нисбатан жуда қаттиқ санкцияларни назарда тутувчи қонун лойиҳасини тақдим этишмоқда. Бу рўйхатга Эрон ҳам киритилиши мумкин.”

 

Президентнинг сўзларига кўра, лойиҳага Эронга нисбатан алоҳида чекловлар қўшиш таклифи тўғридан-тўғри ўзидан чиққан.

 

Қонун лойиҳаси апрель ойининг бошида Сенатнинг икки партияли гуруҳи томонидан тақдим этилган бўлиб, унинг асосий ҳомийлари сенатор Линдси Грем ва сенатор Ричард Блументал ҳисобланади. Ҳужжат Россиянинг савдо ҳамкорларига нисбатан иккиламчи санкцияларни назарда тутади.

 

Таклифга кўра, Россиядан нефть, газ, уран ва бошқа стратегик товарларни харид қилаётган давлатлардан АҚШга амалга ошириладиган импортга 500 фоизлик бож ставкаси қўлланиши мумкин.

 

Сенатор Ренд Пол ушбу ташаббусни кескин танқид қилиб, Респонсибле Статесрафт нашрига ёзган мақоласида қонун қабул қилинса, “энг катта иқтисодий ва стратегик зарар айнан Қўшма Штатларнинг ўзига етиши” мумкинлигини таъкидлади.