Европа Иттифоқи ўзбекистонлик тадбиркор Рустам Мўминовни санкциялар рўйхатига қўшди
Унинг Россия ҳарбий-саноат комплексини қўллаб-қувватлаши чекловга сабаб бўлган.
Иттифоқ ўзбекистонлик тадбиркорни уруш олиб бораётган Россия порох заводига пахта целлюлозаси етказиб беришда алоқадор деб ҳисоблаб, 19-санкциялар пакетига қўшди. Европа Иттифоқи ҳужжатларида келтирилишича, Рустам Мўминов Ўзбекистон, Россия ва Буюк Британия каби давлатларнинг фуқаролигини олган.
ЕИ ҳужжатида қайд этилишича, 1965 йилда туғилган Мўминовнинг чекловларга учраши Россия ҳарбий-саноат комплексини қўллаб-қувватлаши билан боғлиқ.
Брюсселнинг баҳолашича, Рустам Мўминов Фарғонадаги Фарғона Кимё Заводи пахта целлюлозаси заводини назорат қилади. Унинг маҳсулотлари Перм ва Қозон порох заводларига етказиб берилиши айтилмоқда. Бу материаллар Россия қуролли кучлари учун қурол ишлаб чиқаришда ишлатилган бўлиши мумкин.
Газета.уз'нинг ёзишича, Фарғона кимё заводи ва Рав Материалс Селлулосе “Важние истории”, Vlast.Kz нашрлари ва OCCRP концернининг қўшма текширувида, шунингдек, BBC рус хизматининг текширувида иштирок этган. Материалларда айтилишича, бу икки корхона Россия порох заводларига пахта целлюлозасини ҳам тўғридан-тўғри, ҳам хусусий воситачилар орқали етказиб беради. Журналистларнинг ҳисоб-китобларига кўра, 2022 йилда Россиянинг Украинага кенг кўламли босқини бошланганидан бери ушбу етказиб бериш ҳажми бир неча баробар ошган.
Мазкур ҳолат юзасидан Zamon.uz Фарғона целлюлоза ишлаб чиқартиш кимё заводи сайтида кўрсатилган рақам билан боғланди. Ўзининг исмини айтишни хоҳламаган шахс мазкур хабарларга муносабат бермаслигини айтди.
Ўзбекистон қонунчилигига кўра, Ўзбекистонда бир нечта фуқаролик қабул қилинмайди. Ўзбекистон Конституциясининг 21-моддасида ҳам Ўзбекистонда ягона фуқаролик тан олиши кўрсатиб ўтилган.
Ички ишлар вазири матбуот котиби Шоҳрух Ғиёсовнинг Zamon.uz'га фуқароликдан чиқариш фақат президент қарори билан амалга оширилишини маълум қилди. Унинг айтишича, президент қарори чиқмагунича фуқаро Ўзбекистон фуқаролигидан маҳрум қилинмайди.
Эслатиб ўтамиз, аввалроқ Украина ҳам Фарғона кимё заводига санкциялар қўллаган эди.
