Туркияда Германиядан келган тўрт кишилик оила овқатдан заҳарланиб вафот этди

 

Туркияда саёҳатда бўлган Германия фуқаролари — тўрт кишилик бир оиланинг заҳарланиш оқибатида ҳалок бўлгани маълум қилинди. Маҳаллий ва халқаро ОАВ хабарларига кўра, Истанбулга сафар қилган Божеклар оиласи озиқ-овқатдан заҳарланишдан сўнг шифохонага ётқизилган, аммо кўрилган тиббий ёрдамга қарамай, уларнинг ҳаётини сақлаб қолишнинг имкони бўлмаган.

 

Маълумотларга кўра, Ҳамбург шаҳридан 9 ноябрь куни Истанбулга келган Сарват Божек (32 ёш), унинг турмуш ўртоғи Чиғдам Божек (27 ёш) ҳамда фарзандлари — 6 ёшли Муҳаммад ва 3 ёшли Масал Божеклар “Harbour Suites Old City” меҳмонхонасига жойлашган.

 

11 ноябрь куни оиланинг Ортакўй мавзесида кўча таомлари — мидия, колбаса, шўрва, товуқ гўшти ва бошқа таомларни истеъмол қилганидан сўнг уларнинг аҳволи ёмонлашган. Улар заҳарланиш аломатлари билан шифохонага етказилган ва бирламчи ёрдамдан сўнг уйларига қайтарилган. Бироқ, меҳмонхонага қайтгач, уларнинг аҳволи яна оғирлашгани сабабли қайта шифохонага ётқизилган.

 

12 ноябрь куни икки нафар фарзанднинг ҳаёти сақлаб қолиб бўлмагани, кейинчалик, 14 ноябрь куни онанинг, орадан кўп ўтмай эса отанинг ҳам вафот этгани қайд этилди.

 

Мазкур фожиа юзасидан Туркия ҳуқуқни муҳофаза қилиш органлари тергов-суриштирув ишларини олиб бормоқда.