Владимир Путин АҚШ таклиф қилган тинчлик режасига илк бор муносабат билдирди
Россия президенти ушбу тинчлик режаси Россия–Украина можаросини ҳал қилишга асос бўлиши мумкинлигини таъкидлади.
Россия президенти Владимир Путин АҚШ президенти Доналд Трамп маъмурияти томонидан ишлаб чиқилган Украина бўйича тинчлик режаси Россия–Украина можаросини дипломатик йўл билан ҳал қилиш учун асос бўлиши мумкинлигини маълум қилди. Бу ҳақда у 21 ноябрь куни Россия Хавфсизлик кенгаши йиғилишида сўзлаган нутқида айтди.
Путиннинг билдиришича, Москва Америка томони томонидан тақдим этилган режани олган, бироқ ҳужжат ҳозирча Россия билан “батафсил даражада” келишилмаган. Давлат раҳбарининг таъкидлашича, бунинг асосий сабаби — Украина томони режадаги таклифларга розилик билдирмаётгани.
Путиннинг сўзларига кўра, Аляскада ўтган музокаралардан сўнг АҚШ томони томонидан пауза кузатилган, бу эса Киевнинг Трамп таклиф қилган дастлабки тинчлик режаси бўйича тасдиқ бермагани билан изоҳланади. Унинг айтишича, айнан шундан сўнг режанинг 28 банддан иборат янгиланган варианти пайдо бўлган.
“Биз ушбу матнни Америка маъмурияти билан мавжуд алоқа каналлари орқали олдик. У, менинг фикримча, якуний келишувга асос бўлиши мумкин. Бироқ режадаги қатор масалалар мазмунан биз билан муҳокама қилинмаган. Менимча, бунга сабаб — АҚШ ҳануз Украина томони розилигини ололмаяпти. Украина бунга қарши”, — деди Путин.
Россия президенти, шунингдек, Украина ва унинг Европадаги иттифоқчилари можарода Россияни “жанг майдонида стратегик мағлуб этиш” ғоясига содиқ қолаётганини таъкидлади. Унинг фикрича, бу позиция реал вазият ҳақида етарли ва объектив маълумотларнинг мавжуд эмаслиги билан боғлиқ.
Аввалроқ, Axios нашри Трамп маъмурияти томонидан ишлаб чиқилган тинчлик режаси лойиҳасини эълон қилган, ҳужжат 28 банддан иборат бўлиб, унда Украина томонидан бир қатор жиддий ён беришлар назарда тутилган. АҚШ ва Украина расмийлари ҳужжатнинг ҳақиқийлигини тасдиқлаган.
Европа Иттифоқи давлатлари эса мазкур режа бўйича ўз эътирозларини билдирган. Уларнинг фикрича, ҳужжат ҳудудий масалалар бўйича ён беришлар ва Украинанинг қисман қуролсизланишини назарда тутгани сабабли қабул қилиб бўлмайди.
