Бугун АҚШ ва Украина делегациялари Женевада музокара ўтказади
Куннинг иккинчи қисмида АҚШ Россия билан ҳам алоҳида учрашув режалаштирган.
АҚШ Президенти Доналд Трамп Украина бўйича таклиф этилган тинчлик режаси ҳали якуний эмаслигини маълум қилди. Оқ уй Киевга таклифни қабул қилиш учун Тҳанксгивинг гача муддат берган бўлсада, режанинг айрим бандлари — хусусан, Украинанинг ҳудудий келишувларга бориши ва ҳарбий қудратини камайтириши Эвропада катта хавотир уйғотган. Бу ҳақда ABC news хабар бермоқда.
АҚШ делегацияси, жумладан, Армия котиби Даниел Дрисколл, Давлат котиби Марко Рубио ва элчи Стив Виткофф Женевада украиналик расмийлар билан учрашади. Вашингтон шунингдек, Россия делегацияси билан ҳам алоҳида музокара ўтказишни режалаштираётгани айтилмоқда. Бу орада бир гуруҳ сенаторлар тинчлик режаси аслида АҚШ томонидан эмас, балки Россия томонидан ишлаб чиқилгани ҳақидаги маълумотларни муҳокама қилиб, уни “Россиянинг истаклар рўйхати” деб аташди. Рубио эса бу фикрларни рад этиб, режа АҚШ томонидан тайёрланганини таъкидлади.
Украина Президенти Владимир Зеленский офиси музокаралар учун делегация таркиби тасдиқланганини, Киев “ҳақиқий ва иззатли тинчликка” эришишга тайёрлигини билдирди. Режада Россия илгари талаб қилиб келган бир қатор оғир шартлар — жумладан, Украинанинг ҳудудий қисмларни бериши ва узоқ масофали қуроллардан воз кечиши — мавжудлиги айтилмоқда. Шу билан бирга, АҚШ ва Европанинг бир қисми бу ҳужжатни “ишланиши лозим бўлган асос” сифатида баҳоламоқда.
