Қирғизистон собиқ президентининг ўғли ва бир қатор сиёсатчилар ҳибсга олинди

 

Қирғизистонда собиқ президент Алмазбек Атамбаевнинг ўғли Қодирбек Атамбаев ҳамда бир қатор сиёсий арбоблар оммавий тартибсизликларни уюштиришга тайёргарлик кўрганликда гумонланиб ҳибсга олинди. Бу ҳақда мамлакат Ички ишлар вазирлиги матбуот хизмати хабар берди.

 

Вазирлик маълумотларига кўра, қўлга олинганлар орасида Миллий хавфсизлик давлат қўмитасининг собиқ раҳбари Дамир Мусакеев, Социал-демократик партия етакчиси Темирлан Султонбеков, собиқ депутатлар Шайлобек Атазов ва Кубаничбек Қодировлар ҳам бор.

 

Ҳуқуқ-тартибот идоралари ушбу шахслар парламент сайлови натижалари эълон қилингач, оммавий норозилик кайфиятини уйғотиш мақсадида бир қатор ноқонуний йиғинлар режалаштирганини билдирган. Тергов материалларига кўра, улар “конституцияга зид талаблар қўйиш”, маъмурий бинолар, телеканаллар, хавфсизлик объектлари ва жазони ижро этиш муассасаларини эгаллашга уринишни муҳокама қилган.

 

Тинтув вақтида қурол-яроғ, ўқ-дорилар, гранаталар, алоқа воситалари, молиявий ҳужжатлар, гиёҳванд моддалар ҳамда 150 минг АҚШ доллари миқдоридаги нақд пул мусодара қилинган. Айбланувчиларга Жиноят кодексининг “Оммавий тартибсизликлар уюштиришга тайёргарлик кўриш” моддаси бўйича айблов қўйилган.

 

Темирлан Султонбеков суд қарори билан 17 январгача ҳибсда қолдирилди. Шунингдек, Эрмек Эрматов ва Урмат Асқарбековлар ҳам тергов ҳибсхонасига жойлаштирилган. Қодирбек Атамбаев, Дамир Мусакеев, Шайлобек Атазов ва Кубаничбек Қодировларнинг ҳибсга олиниши бўйича суд жараёни давом этмоқда.

 

22 ноябрь куни собиқ президентнинг рафиқаси ва яна бир фарзанди ҳуқуқ-тартибот органларига сўроқ учун чақирилган. Ўша куни иқтисодий жиноятлар бўйича давлат хизматининг собиқ раҳбари Сйимик Жапикеэв ҳам ҳибсга олингани ҳақида хабар берилди.

 

Шу билан бирга, сентябрь ойида Бишкек суди Клооп ахборот порталининг икки собиқ ходимини оммавий тартибсизликларни қўзғатганликда айбдор деб топиб, беш йилга озодликдан маҳрум этган эди. Маҳаллий ОАВ вакиллари давом этаётган жараёнларни “сиёсий босим” деб баҳоламоқда.