Трамп маъмуриятининг Украина бўйича тинчлик режаси 19 бандга қисқартирилди

 

АҚШ президенти Доналд Трамп томонидан Украинадаги ҳарбий ҳаракатларни тугатиш мақсадида таклиф этилган тинчлик режаси қайта кўриб чиқилиб, 28 банддан 19 бандга қисқартирилди. Бу ҳақда dw.com нашри хабар бермоқда.

 

Дастлабки ҳужжат кўплаб мутахассислар томонидан Россия манфаатларига яқинликда айбланиб, кескин танқидга учраган эди. Қисқартиришлар Женевада ўтказилган музокаралар якунида киритилган. Манбалар айнан қайси бандлар олиб ташланганини очиқламади. WP суҳбатдошлари бандлар сони бўйича якуний келишув ҳали тўлиқ шаклланмаганини таъкидлади.

 

Уларнинг маълумотига кўра, Европа Иттифоқи томонидан таклиф этилган альтернатив ёндашувдан фарқли ўлароқ, асосий негиз сифатида АҚШ ишлаб чиққан дастлабки лойиҳа сақлаб қолинмоқда.

 

23 ноябрь куни Женевада Украина Миллий хавфсизлик ва мудофаа кенгаши котиби Рустем Умеров АҚШнинг янгиланган режаси бўйича музокаралар ўтказди. У режага бир қатор таҳрирлар киритилганини тасдиқлади, бироқ мазмуни ҳақида батафсил маълумот бермади.

 

Украина Президенти Офиси маслаҳатчиси Александр Бевз ҳам режадаги қатор бандлар ўзгартирилгани ёки бутунлай чиқариб ташланганини билдирди.

 

Шунингдек, 23 ноябрь куни Германия канцлери Фридрих Мертс ўз ташаббусини илгари суриб, жараённи соддалаштириш мақсадида режани 28 банддан битта асосий тамойилга қисқартиришни таклиф этди. У Трамп ҳужжатидаги Россиянинг музлатилган активларини Украинага йўналтириш ҳамда фойданинг ярмидан АҚШга улуш ажратиш ҳақидаги бандни кескин танқид қилиб, буни “мантиқан асосланмаган” деб баҳолади.