БМТ янги бош котибни сайлаш жараёнини расман бошлади

 

Бирлашган Миллатлар Ташкилоти аъзо давлатлардан 2027 йил 1 январдан лавозимга киришадиган бош котиб лавозимига номзодларни кўрсатишни сўради. Бу ҳақда Реутерс агентлиги хабар бермоқда. Мазкур жараён БМТ Хавфсизлик кенгаши раиси ҳамда Бош ассамблея президенти томонидан юборилган қўшма мактуб орқали бошланган бўлиб, у амалдаги бош котиб Антонио Гутерришни алмаштириш жараёнининг расмий бошланиши ҳисобланади.

 

Мактубда ташкилот тарихида бирор маротаба аёл шахс бош котиб лавозимини эгалламаганига урғу берилган. Шу муносабат билан давлатлардан юқори раҳбарлик лавозимида гендер тенглигини таъминлаш мақсадида аёл номзодларни кўриб чиқишга алоҳида эътибор қаратиш сўралган.

 

Шунингдек, номзодларни танлашда минтақавий баланс ва хилма-хиллик муҳим мезонлардан бири сифатида қайд этилган.

 

БМТ Хавфсизлик кенгаши 2026 йил охирига қадар 10-бош котиб лавозими учун битта номзодни танлаб, уни Бош ассамблеяга тавсия қилади.

 

Ҳозирча оммавий равишда эълон қилинган номзодлар орасида Чилининг собиқ президенти Мишел Бачелет, Коста Риканинг собиқ вице-президенти Ребеса Грйнспан, аргентиналик дипломат, Халқаро атом энергияси агентлиги (XAEA) раҳбари Рафаэл Гросси бор.

 

Бош котиб бўйича якуний қарор БМТ Хавфсизлик кенгашининг вето ҳуқуқига эга беш доимий аъзоси — АҚШ, Россия, Буюк Британия, Хитой ва Франция — ўзаро келишувига эришганидан сўнг қабул қилинади.