Зеленский: Трамп билан учрашувда Европа ҳамкорлари иштироки шарт
Украина Президенти Трамп билан музокаралар учун янги шарт қўйди.
Украина Президенти Владимир Зеленский АҚШ Президенти Доналд Трамп билан учрашишга тайёрлигини, бироқ музокараларда Европа ҳамкорлари иштироки мажбурий эканини маълум қилди. Бу ҳақдаги баёнот “Strana.ua” томонидан эълон қилинган.
Зеленскийнинг таъкидлашича, Трамп билан юзма-юз мулоқот қилиниши зарур бўлган бир қатор “нозик масалалар” мавжуд. Аммо Украина раҳбари музокаралар фақат халқаро шериклар билан биргаликда олиб борилгандагина самарали бўлишини қайд этди.
Украина Президенти, шунингдек, Женевада АҚШ билан ўтказилган музокаралар ижобий натижа берганини билдирди.
“Бизнинг қўлимизда Женевадаги мулоқот жараёнида жамоаларимиз томонидан ишлаб чиқилган консептуал ҳужжат мавжуд. У ҳозир муҳокама қилинмоқда ва биз Америка Қўшма Штатлари — Президент Трамп иштирокида — ҳамда Европа билан биргаликда олдинга силжишимиз мумкин”, — деди Зеленский.
Украина томонидаги манбага кўра, янги тинчлик режаси бўйича ҳужжатнинг якуний матни ҳали келишилмаган. Манбанинг айтишича, бандларнинг катта қисми бўйича келишув мавжуд, аммо камида учта принципиал масала бўйича келишмовчиликлар сақланиб қолган. Жумладан, айрим ҳудудларнинг тақдири борасида якдил позиция йўқ.
“Украина қабул қилган аниқ версия бор, деб айтиш ҳозирча мутлақо нотўғри”, — дея қўшимча қилган манба.
