Путин: Россияда муҳожирлар масаласи ижтимоий кескинликка сабаб бўлмаслиги лозим
Унинг сўзларига кўра, мамлакатга келаётган хорижликлар Россия муҳитига мослашишга ва ижтимоий талабларни бажаришга тайёр бўлиши керак.
Россия президенти Владимир Путин “Номад” телеканали бош муҳаррири Наталя Кролевичга берган интервьюсида муҳожирлар мавзусига оид муносабатини билдирди. Бу ҳақда “РИА Новости” хабар бермоқда.
Давлат раҳбари таъкидлашича, мамлакатда муҳожирлар масаласи аҳолида норозилик уйғотмаслиги, барча жараёнлар тартибли ташкил этилиши зарур.
“Биз фуқароларимиз учун, Россия Федерацияси фуқаролари учун ҳамма нарса тартибда бўлишини таъминлашимиз керак, токи бу масала атрофида содир бўлаётган барча ҳодисалар ғазабга сабаб бўлмаслиги керак”,” — деди Путин.
Унинг қўшимча қилишича, Россияда ишлаш ва яшаш истагини билдирган хорижий фуқаролар маҳаллий муҳитга мослашишга, мамлакат қонунлари ва ижтимоий тартибларига риоя қилишга тайёр бўлишлари талаб этилади.
