Путиннинг Қирғизистонга ташрифи давомида Украина элчихонаси яширилди
Маҳаллий ОАВнинг қайд этишича, элчихона олдига экран ўрнатилиши Россия президентининг ташрифи давомида протокол элементлари ва маросим тартибини таъминлаш мақсадида амалга оширилган.
Бишкекда Россия президенти Владимир Путиннинг ташрифи давомида хавфсизлик ва протокол талаблари кучайтирилди. Ташриф доирасида шаҳар марказидаги айрим ҳудудларда вақтинчалик чекловлар жорий этилди. Шу муносабат билан Украинанинг Қирғизистондаги элчихонаси олдида катта LED экран ўрнатилиб, элчихона биноси ташқи кўриниши ёпиб турилди. Маҳаллий ОАВнинг қайд этишича, экран ўрнатилиши Россия президентининг ташрифи давомида протокол элементлари ва маросим тартибини таъминлаш мақсадида амалга оширилган.
Россия президенти Путиннинг 25–26 ноябрь кунлари Бишкекка амалга оширган ташрифи Қирғизистон томонидан энг юқори даражада ташкил этилди. Аэропортда миллий раққосалар, чолғу жамоалари иштирокидаги кутиб олиш маросими ўтказилди. Расмий маълумотларга кўра, президент кортежи махсус қўриқчилар, чавандозлар ва давлат байроқлари билан ҳамроҳ қилинган.
Путиннинг ташрифи муносабати билан Бишкекдаги барча мактаблар вақтинчалик масофавий таълимга ўтказилди, шаҳар бўйлаб транспорт ҳаракати чекланиб, бир қатор йўналишларда вақтинчалик чекловлар жорий этилди.
Украина элчихонаси вакиллари LED экран ўрнатилганини тасдиқлаб, бу ҳолатнинг Россия президентининг ташрифи билан боғлиқлигини қайд этди. Қирғизистон томони эса экран протоколнинг янги элементлари сифатида қўлланганини билдирди.
