Шерзод Асадов BBC World News’нинг Евросиё бўйича вакили билан учрашув ўтказди
Учрашувда BBC билан амалга оширилган лойиҳалар сарҳисоби ва медиа ҳамкорликнинг келгуси режаларига оид масалалар муҳокама қилинди.
28 ноябрь куни Ўзбекистон Президентининг матбуот котиби Шерзод Асадов BBC World News’нинг Евросиё мамлакатлари бўйича вакили Сергей Становкин билан учрашди.
Асадовнинг маълум қилишича, сўнгги учрашувдан буён BBC билан ҳамкорлик доирасида қарийб 10 та лойиҳа амалга оширилган. Хусусан, телеканал Ўзбекистонда ўтган Бухородаги замонавий санъат биенналеси, Самарқанддаги УНEССО Бош конференцияси сессияси каби йирик тадбирлар ва бошқа муҳим воқеаларни мунтазам ёритиб борди.
Учрашувда медиа соҳасидаги ҳамкорликнинг истиқболдаги режаларига ҳам тўхталиб ўтилди. Рақамли даврда хавфсиз ва масъулиятли журналистиканинг долзарблиги, сунъий интеллект технологияларининг тез тарқалиши фонида фактчекинг, профессионал таҳлил кўникмалари ва медиа саводхонлигини ошириш зарурлиги алоҳида таъкидланди.
Шерзод Асадов бундан аввал ҳам, шу йилнинг февраль ойида Сергей Становкин билан учрашув ўтказган эди.
