Парранда гриппи COVID-19 дан ҳам хавфли бўлиши мумкин — олим огоҳлантирди
Мутахассисларнинг таъкидлашича, вирус соғлом одамларга ҳам зарар етказиши мумкин, бироқ ҳозирча глобал хавф даражаси паст.
Франциянинг Пастер институти қошидаги Нафас йўллари инфекциялари маркази директори Мари-Энн Рамей-Велти юқори патоген H5 парранда гриппи вирусининг глобал хавфи кескин ортиб бораётганини маълум қилди. Бу ҳақда Reuters агентлиги хабар бермоқда.
Мутахассиснинг таъкидлашича, H5 вируси сўнгги йилларда юз миллионлаб паррандалар нобуд бўлишига сабаб бўлган, бу эса озиқ-овқат таъминоти занжирига ҳам жиддий таъсир кўрсатмоқда. Инсонлар орасида касалланиш ҳолатлари ҳозирча жуда кам учраётгани қайд этилган, бироқ вируснинг сутэмизувчилар ва одамларга мослашиш эҳтимоли энг катта хавф ҳисобланади.
“Агар вирус одамдан одамга юқиш қобилиятига эга бўлса, пандемия бошланиши мумкин. COVID-19 пандемияси бошида бўлгани каби, H5га қарши ҳам аҳолида антикорлар мавжуд эмас,” — дейди Рамей-Велти.
Олимнинг фикрича, парранда гриппи соғлом одамларга ҳам жиддий зарар етказиши мумкин, шу боис пандемия COVID-19 дан оғирроқ кечиши эҳтимолдан холи эмас. АҚШда паррандалар, қорамоллар ва айрим одамларда H5N1 аниқланган ҳолатлар қайд этилган. Ноябрь ойида Вашингтон штатида биринчи бемор инфекция оқибатида вафот этди.
Шу билан бирга, мутахассислар ҳозирги глобал тайёргарлик даражаси COVID-19 дан юқорироқ эканини билдиради — вакцина намуналари, антивирал дори захиралари ва зарур технологиялар мавжуд.
Бутунжаҳон ҳайвонлар саломатлиги ташкилоти илмий бўлими раҳбари Грегорио Торреснинг қайд этишича, ҳозирча пандемия хавфи паст даражада бўлиб қолмоқда. “Товуқ гўшти ва тухум истеъмол қилиш учун хавотирга асос йўқ,” — деди у.
