Россияда WhatsApp тўлиқ блокланиши мумкин
Августда мессенжер орқали қўнғироқларни блоклаган эди.
Роскомнадзор Россияда WhatsApp'ни тўлиқ блоклаш билан таҳдид қилди. Бу ҳақида DW нашри хабар бермоқда.
“Ушбу мессенжер мамлакат ҳудудида террорчилик ҳаракатларини уюштириш ва амалга ошириш, уларнинг ижрочиларини ёллаш, шунингдек, фуқароларимизга нисбатан фирибгарлик ва бошқа жиноятлар учун фойдаланилмоқда”, дейилади идора баёнотида.
Роскомнадзор, шунингдек, WhatsApp Россия қонунчилигини бузишда давом этаётганини ва шу сабабли у мамлакатда тўлиқ блокланиши мумкинлигини билдирди.
28 ноябрда Россиядаги фойдаланувчилар WhatsApp'да кенг кўламли носозликлар юз бераётганини хабар қилишди. Август ойида Роскомнадзор ушбу мессенжер орқали қўнғироқларни блоклаган эди. Шунга қарамай, WhatsApp'дан Россиянинг юқори лавозимли амалдорлари, жумладан президент ёрдамчиси Юрий Ушаков ҳам фаол фойдаланишда давом этмоқда.
