Трамп: “Автоперо ёрдамида имзоланган Байден ҳужжатлари бекор қилинади”
Трамп Жо Байденнинг автоперо орқали имзолаган барча фармонлари ўз кучини йўқотишини маълум қилди.
АҚШ президенти Доналд Трамп Трутҳ Сосиал платформасида автоперо — автоматик имзо қўювчи қурилма — орқали имзоланган Жо Байден давридаги барча фармонлар ва ҳужжатлар бекор қилинишини билдирди. Трампнинг айтишича, автоперо президентнинг махсус рухсатисиз қўлланмаслиги керак ва Байден томонидан имзоланган ҳужжатларнинг “тахминан 92 фоизи” шу тоифага киради.
Автоперо асосан Байденнинг президентлик муддатининг охирида, афв этиш ва жазони енгиллаштириш бўйича ҳужжатларни имзолаш жараёнида ишлатилган эди. Афв этилганлар орасида собиқ президентнинг ўғли Ҳантер Байден ҳам бор. Жо Байден эса барча қарорларни шахсан ўзи тасдиқлаганини, техник имзолаш жараёнини эса ёрдамчилар бажарганини таъкидлаган.
Трамп аввал ҳам Байденнинг автоперо орқали расмийлаштирилган афв ҳужжатлари ҳақиқий эмаслигини даъво қилган эди. Байден эса бу фикрни қатъиян рад этиб, барча қарорлар қонуний ва шахсий тасдиқдан ўтганини билдирган.
