Франция ТИВ: “Украинани кейинги икки йил давомида молиявий қийинчиликлардан ҳимоя қиламиз”
Евроиттифоқ Россиянинг музлатилган активлари бўйича қарорни 18 декабрда қабул қилиши мумкин.
Франция ташқи ишлар вазири Жан-Ноэл Барро Евроиттифоқ Россиянинг музлатилган активлари бўйича қарорни 18 декабрь куни қабул қилиши мумкинлигини маълум қилди. Унинг сўзларига кўра, бу борадаги муҳокамалар яқин кунларда ҳам давом эттирилади.
Барро Европа давлатлари Украинани яқин икки йил ичида иқтисодий босимлардан ҳимоялашга қатъий бел боғлаганини таъкидлади. Унинг фикрича, активларга нисбатан кескин чоралар қўллаш Европа хавфсизлиги ва барқарорлиги учун муҳим аҳамиятга эга.
“Энг устувор вазифа — Европа ҳудудида жойлашган Россия активларини блокланган ҳолда сақлашни кафолатлашдир. Бу бизга келажакдаги тинчлик шароитларига таъсир кўрсатиш имконини берадиган муҳим сиёсий восита саналади”, — деди Франция ТИВ раҳбари.
