АҚШ иммигрантлар учун иш рухсатномаларининг амал қилиш муддатини қисқартирди
Иммигрантлар ҳолатини мунтазам текшириб бориш мақсадида иш рухсатномалари қисқа муддатга берилади.
Қўшма Штатлар ҳукумати қочқинлар, бошпана сўровчилари ва бошқа иммигрантларга иш рухсатномаларини бериш тартибини қайта кўриб чиқди. Янгиланган талабларга кўра, мазкур ҳужжатларнинг амал қилиш муддати 5 йилдан 18 ойгача қисқартирилди.
АҚШ Фуқаролик ва иммиграция хизмати маъмурияти таъкидлаганидек, ушбу чора-тадбирлар мамлакатда меҳнат фаолияти билан шуғулланаётган хорижликлар устидан назоратни кучайтиришга қаратилган. Ташкилот директори Жозеф Эдлоунинг маълум қилишича, рухсатномалар муддатини қисқартириш мурожаат этувчиларнинг ҳуқуқий ҳолатини мунтазам равишда баҳолаб бориш имконини яратади.
“Бу Қўшма Штатларда ишлашга интилаётган шахслар жамият хавфсизлигига таҳдид солмаслигини таъминлайди. Аввалги маъмурият даврида мамлакатга киришга рухсат олинган шахс томонидан Миллий гвардия хизматига уюштирилган ҳужум шундан далолат берадики, текширувларни тез-тез амалга ошириш зарур,” — деди Эдлоу.
Янги қоида қочқин мақомини олганлар, бошпана берилганлар, чиқариб юбориш жараёни тўхтатилган шахслар ҳамда бошпана олиш тўғрисидаги аризаси кўриб чиқилаётганларга нисбатан татбиқ этилади. Ўзгаришлар 5 декабрдан бошлаб кучга кирди.
