Германия ҳарбий хизматнинг янги моделини тасдиқлади

Германия Бундестаги мамлакатда ҳарбий хизматнинг янги модели бўйича қонунни маъқуллади. Қонун лойиҳаси мудофаа вазири Борис Писториус томонидан тақдим этилиб, унда ёшларни тиббий кўрикдан ўтказиш ва ҳарбий рўйхатга олиш тизимини тиклаш назарда тутилган. Парламент аъзоларининг кўпчилиги ташаббусни қўллаб-қувватлади.

 

Янги тартибга кўра, 2027 йилнинг июлидан бошлаб 18 ёшга тўлган барча йигитлар Мудофаа вазирлиги базасидан рўйхатдан ўтиши, саломатлиги ҳақида маълумот тақдим этиши ва ҳарбий хизматга бориш ёки бормаслик истагини билдиришлари шарт бўлади. Қизлар эса хоҳишига кўра ушбу жараёнда иштирок этиши мумкин. Бироқ бу тартиб уларнинг автоматик тарзда хизматга чақирилишини англатмайди.

 

Агар армияга зарур бўлган чақирувчилар сони етарли бўлмаса, махсус механизм — лотерея ёки бошқа танлаш усули орқали чақирув жорий этилиши мумкин. Бундай қарор фақат парламент алоҳида овоз бергандан сўнг кучга киради. Ҳарбий хизматнинг минимал муддати олти ой этиб белгиланган.

 

Қонун мамлакат бўйлаб муҳокамаларга сабаб бўлди ва бир қатор шаҳарларида мажбурий хизматга қарши норозилик намойишлари ўтказилди. Германия 2011 йилда мажбурий ҳарбий хизматни бекор қилган эди, энди эса глобал хавфсизлик муҳитидаги ўзгаришлар фонида тизим қайта кўриб чиқилмоқда.