Саида Мирзиёева: “Ҳар бир аёл ўз салоҳиятини тўлиқ рўёбга чиқариши учун шароит ярата оламиз”

 

Авазада "Замонавий жамиятда хотин-қизларнинг ўрни" мавзусида халқаро конференция бўлиб ўтди. Унда Президент администрацияси раҳбари Саида Мирзиёева иштирок этиб, тенг ҳуқуқлилик ва хотин-қизлар ҳиссасининг жамиятдаги ўрни тарихан чуқур илдизларга эга эканини таъкидлади. У тадбир давомида Ўзбекистонда аёлларни қўллаб-қувватлаш, уларнинг таълим ва бизнесдаги имкониятларини кенгайтиришга қаратилган ислоҳотлар ҳақида маълумот берди.

 

Мирзиёева ўз чиқишида аёлларнинг ҳуқуқларини ҳимоя қилишда ўзаро бирдамлик ва қўллаб-қувватлашнинг муҳимлигини алоҳида қайд этди. Унинг таъкидлашича, бугунги кунда аёлларга қулай шароит яратиш, уларнинг салоҳиятини рўёбга чиқариш давлат сиёсатининг устувор йўналишларидан биридир. Конференция иштирокчилари бу борадаги халқаро тажрибалар билан ўртоқлашдилар.

 

“Биргаликдаги саъй-ҳаракатларимиз билан ҳар бир аёл ўз салоҳиятини тўлиқ рўёбга чиқариши учун шароит ярата оламиз”, — деди Саида Мирзиёева. У бу жараёнда ҳамкорлик, маърифат ва қўллаб-қувватлаш асосий омиллар эканини қайд этди. Конференция хотин-қизлар мавзусида глобал фикр алмашув майдонига айланди.