Қирғизистон Конституциявий суди ўлим жазосини тиклаш таклифини рад этди
Суднинг таъкидлашича, ўлим жазосини қайта тиклаш конституцияга зид, қабул қилиб бўлмайдиган ва ҳуқуқий жиҳатдан имконсиздир.
Қирғизистон Конституциявий суди болаларни зўрлаш ва зўрлаш билан боғлиқ қотиллик учун ўлим жазосини жорий қилиш бўйича қонун лойиҳасини кўриб чиқди. Суднинг таъкидлашича, ўлим жазосини қайта тиклаш Конституцияга зид, қабул қилиб бўлмайдиган ва юридик жиҳатдан имконсиздир.
Хулосада қайд этилишича, ўлим жазосини тақиқлаш ва яшаш ҳуқуқи устуворлигини эътироф этиш нафақат норматив, балки асосий қадрият мезонидир. Конституцияга ўзгартириш киритиш орқали ўлим жазосини тиклаш ҳуқуқий тараққиёт ва шахс қадр-қиммати устуворлигини бузади.
Суд шунингдек, халқаро-ҳуқуқий жиҳатларни ҳам ҳисобга олди. Қирғизистон Фуқаролик ва сиёсий ҳуқуқлар тўғрисидаги халқаро пактнинг иккинчи факультатив протоколига аъзо бўлиб, ўлим жазосини бекор қилиш мажбуриятини олган. Шу боис, ўлим жазосини қайта жорий қилиш бўйича қонун лойиҳаси референдумга қўйилиши мумкин эмас ва қонуний ташаббуслар тугатилади.
Октябрь ойида президент Садир Жапаров 2007 йилда бекор қилинган ўлим жазосини тиклаш бўйича ўзгартиришлар киритишни топширган эди.
