Шавкат Мирзиёев амалий ташриф билан Ашхободга жўнаб кетди
Президент Туркманистон бетарафлигининг 30 йиллигига бағишланган халқаро форумда қатнашади.
Президент Шавкат Мирзиёев Туркман халқининг миллий етакчиси, Туркманистон Халқ Маслаҳати раиси Гурбангули Бердимуҳамедовнинг таклифига биноан 11 декабрь куни амалий ташриф билан Ашхободга жўнаб кетди. Давлат раҳбари ташриф давомида бир қатор тадбирларда иштирок этиши режалаштирилган.
12 декабрь куни Ўзбекистон президенти Туркманистоннинг доимий бетарафлиги эълон қилинганининг 30 йиллиги, Халқаро бетарафлик куни ҳамда 2025 йилнинг “Халқаро тинчлик ва ишонч йили” деб эълон қилинганига бағишланган халқаро форумда нутқ сўзлайди. Тадбирда кўплаб давлат ва ҳукумат раҳбарлари, шунингдек, йирик халқаро ташкилотлар вакиллари қатнашади.
Форумнинг ялпи сессиясида Президент Мирзиёев “Тинчлик ва ишонч: барқарор келажак йўлидаги мақсадлар муштараклиги” мавзусида маъруза қилади. Шунингдек, ташриф доирасида бир қатор икки томонлама учрашувлар ўтказилиши ҳам режалаштирилган.
